''မနက် ၅ နာရီကျော်၊ ၆ နာရီလောက်မှာ လေပြင်းစတိုက်တယ်။ မိုးသည်းတယ်။ ညောင်ဦးမြို့မှာ သစ်ပင်တချို့လဲတယ်။ မနက်ပိုင်းကစပြီး လေဆိပ်မှာ လေပိုတိုက်တယ်။ ရန်ကုန်ကနေ ပုဂံညောင်ဦးလေဆိပ် ဆင်းမယ့် ရန်ကုန်အဲယားဝေး၊ အဲ မန္တလေး၊ အဲပုဂံ မနက်ပိုင်း လေယာဉ်ခရီးစဉ် တချို့ ဖျက်သိမ်းလိုက်တယ်လို့ သိရတယ်။ ရန်ကုန်အဲယားဝေးက ညောင်ဦးမှာ မဆင်းနိုင်ဘဲ မန္တလေးလေဆိပ်မှာ သွားဆင်း ရတယ်။ အခုတော့ လေတိုက်လိုက်၊ မိုးရွာလိုက် ဖြစ်နေတယ်။ မနက်က လောက်တော့ မပြင်းတော့ပါဘူး''ဟု ညောင်ဦးမြို့မှ ဒေသခံတစ်ဦးက အောက်တိုဘာလ ၂၃ ရက်နေ့ နံနက် ၁၁ နာရီ ၀န်းကျင်တွင် ပြောကြားသည်။
မြန်မာစံတော်ချိန် နံနက် ၆ နာရီခွဲအချိန် တိုင်းထွာချက်များ အရ မြန်မာနိုင်ငံ အလယ်ပိုင်းကို ဖြတ်ကျော်နေသော ကုန်းတွင်းမုန်တိုင်းသည် မန္တလေးတိုင်းဒေသကြီး ညောင်ဦးမြို့ အနီးတွင် ဗဟိုပြုနေကြောင်း သိရှိရသည်။
မုန်တိုင်းသည် အရှေ့မြောက်ဘက်သို့ ဆက်လက်ရွေ့လျားလျက် အောက်တိုဘာလ ၂၃ ရက်နေ့ နံနက်မှ နောက် ၁၂ နာရီအတွင်း မုန်တိုင်းငယ်အဖြစ်သို့ အားပျော့သွားမည်ဟု မိုးလေ၀သနှင့် ဇလဗေဒညွှန်ကြားမှု ဦးစီးဌာနမှ ခန့်မှန်းထားသည်။
မုန်တိုင်းသည် လက်ရှိတွင် အညိုရောင်အဆင့် ဖြစ်ပြီး မြန်မာနိုင်ငံ အလယ်ပိုင်းကို ဖြတ်သန်းလျက် ရှိသည်။
မုန်တိုင်း၏အရှိန်ကြောင့် မကွေးတိုင်းဒေသကြီး၊ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး တို့တွင် လေတိုက်နှုန်း တစ်နာရီလျှင် မိုင် ၅၀ အထိ ရှိနိုင်ကြောင်း သိရှိရသည်။
ဘင်္ဂလားပင်လယ်အော်တွင် ဖြစ်ပေါ်ခဲ့သော ဆိုင်ကလုန်းမုန်တိုင်း ဂီရိသည် ရခိုင်ကမ်းရိုးတန်းဒေသကို ဖြတ်ကျော်ပြီးနောက် ကုန်းတွင်းမုန်တိုင်း အဖြစ်သို့ ပြောင်းလဲကာ အောက်တိုဘာလ ၂၃ ရက်နေ့ နံနက် ၃ နာရီခွဲတွင် မကွေးတိုင်းဒေသကြီး စလင်းမြို့ကို ဗဟို ပြုနေခဲ့သည်။ ထို့နောက် မြန်မာစံတော်ချိန် နံနက် ၆ နာရီဝန်းကျင်တွင် မန္တလေးတိုင်းဒေသကြီး ညောင်ဦးမြို့ကို ဗဟိုပြုလာခဲ့ခြင်း ဖြစ်သည်။